हेटौंडा,३० मंसीरः चलचित्र विकास वोर्डका अध्यक्ष केशव भट्टराईको निधन भएको छ। आईतबार राती करिब १०ः३० बजे उनको निधन भएको हो ।
परिवार आफन्तजनले काठमाण्डौंको चाबहिलस्थित ओम अस्पताल पुर्याउदा उनको निधन भईसकेको अस्पताल श्रोतले जनाएको छ।
निधनको कारण खुल्न नसके पनि हृदयघात भएको हुनसक्ने प्रारम्भिक अनुमान गरिएको छ। पोस्टमार्टम रिपोर्ट आएपछि मात्र निधनको कारण थाहा हुने बताइएको छ।
५४ बर्षको उमेरमा नै निधन भएका भट्टराईले दर्जनौँ चलचित्रहरु तथा टेलिसिरियलहरुमा अभिनय गरेका थिए भने ‘आफ्नो मान्छे’, ‘छोडी गए पाप लाग्ला’, ‘देवर बाबु’, ‘कर्मयोद्दा’, ‘सो सिम्पल’, ‘ब्रासलेट’, ‘यात्रा’ लगायतका सिनेमाहरु निर्माण गरेका थिए।
उनी ८ महिनाअघि चलचित्र विकास बोर्डको अध्यक्षमा नियुक्त भएका थिए। उनको शवलाई आज सोमबार पोस्ट्मार्टम गरिने जनाइएको छ।
