हेटौंडाः प्रतिष्ठान स्थापनालगायत सातबुँदे बकैया घोषणापत्र जारी गर्दै बकैया कला–साहित्य महोत्सव सकिएको छ । आफ्नो स्थापनाको २९औँ वार्षिकोत्सवका अवसर पारेर झरना साहित्यिक परिवार मकवानपुरले आयोजना गरेको दुइदिने बकैया कला–साहित्य महोत्सव–२०७८ विविध कार्यक्रमपछि सातबुँदे बकैया घोषणापत्र जारी गर्दै समापन भएको हो ।
महोत्सवमा ६ प्रदेशका २० जिल्लाका साथै स्थानीय साहित्यकर्मी, कलाकर्मी, सङ्गीतकर्मी, स्थानीय संस्कृतिकर्मी तथा स्थानीयहरू गरी सयौँको उल्लेखनीय उपस्थिति रहेको थियो । बकैया गाउँपालिकाको आर्थिक व्यवस्थापन र बुद्ध मावि, बकैया–३ हात्तीसुँडेको सहकार्यमा विद्यालय प्राङ्गणमा महोत्सव आयोजना गरिएको हो ।
महोत्सवको पहिलो दिन विभिन्न १० व्यक्ति तथा संस्थालाई विविध विधाका पुरस्कार तथा सम्मानहरू समर्पित गरिएको थियो । सोही दिन साङ्गितिक साँझसमेत आयोजना भएको थियो । त्यस अवसरमा मकवानपुरका ईश्वर खड्का, पुरुषोत्तम आचार्य, प्रमेन्द्र महर्जन, राज घिमिरे तथा पर्साका अजमत अली अन्सारी लगायतका गायक तथा संगितकर्मीहरूको साथ रहेको थियो ।
महोत्सवका दुवै दिन जिल्ला तथा जिल्लाबाहिरका साहित्यकारहरूका विविध विधाका साहित्यिक सिर्जनाहरूको साथमा स्थानीय साङ्गीतिक–साँस्कृतिक प्रस्तुति, झाँकी, खैँजडी भजन आदिसमेत महोत्सवका आकर्षण रहेका थिए । साहित्यिक तथा गैर साहित्यिक पुस्तकहरुको प्रदर्शनी तथा स्कुले विद्यार्थीहरुको चित्रकला प्रदर्शनीले पनि महोत्सवको रौनक थपेको थियो ।
महोत्सवकै क्रममा झरना साहित्यिक परिवारका उपाध्यक्ष विश्वनाथ सञ्जेलको ‘फर्कियौ किनारबाट’ नामक गजल सङ्ग्रह विमोचन भएको थियो । साथै महोत्सवमा पठन संस्कृति अभियन्ता सुरेश श्रेष्ठको अगुवाइमा ‘पुस्तकालय अभियान मकवानपुर’द्वारा ‘हात्तीसुँडे सार्वजनिक पुस्तकालय’को स्थापनार्थ पुस्तकहरु सङ्कलन भएका थिए ।
कार्यक्रमको अर्को विशेष आकर्षण साहित्यिक तथा सामयिक बहसहरु थिए । महोत्सवमा ‘सिर्जनामा स्थानीय रङ’, ‘विद्यालयः सिर्जनशील सीप विकासको केन्द्र’, ‘स्थानीय तहमा प्रज्ञा प्रतिष्ठान अभ्यासः कति सहज, कति असहज?’, ‘स्थानीय सरकार सञ्चालनका पाँच वर्षः कति सफल, कति असफल?’, विषयक चारवटा छुट्टाछुट्टै बहसहरु समेत सञ्चालन भएका थिए ।
बकैया गाउँपालिकाका अध्यक्ष दामोदर खनालको प्रमुख आतिथ्य तथा उपाध्यक्ष सरला बोलखेको विशिष्ट आतिथ्यमा सम्पन्न कार्यक्रममा नेपाल प्रज्ञा प्रतिष्ठानका प्राज्ञ डा. देवी नेपाल, मकवानपुरे अग्रज साहित्यकारहरू तुलसी थापा, आरसी रिजाल, निमेष निखिल, जिल्ला बाहिरबाट उपस्थित साहित्यकारहरूमा पर्साबाट गोपाल अस्क, अजमत अली अन्सारी, स्याङ्जाबाट मिलन समीर, सुनसरीबाट टीका आत्रेय, चितवनबाट सुरेन्द्र अस्तफल, सर्लाहीबाट सुमन घिमिरे अग्रिम र सञ्जय सुदामा, धादिङबाट यात्रीप्रकाश पाण्डे र हीरा अधिकारी, कालीकोटबाट ध्रुव सञ्ज्याल, रुपन्देहीबाट विष्णु विवश पोखरेल, सुशील सापकोटा, मकवानपुरे दर्जनौँको सङ्ख्यामा कवि तथा साहित्यकारहरुले रचना सुनाएका थिए ।
कार्यक्रममा मकवानपुरे साहित्यिक संघ, संस्थाका प्रतिनिधिहरु, झरना साहित्यिक परिवार मकवानपुरका सल्लाहकारहरू, पुरस्कार संस्थापकहरु, स्थानीय जनप्रतिनिधिहरु, स्थानीय सामाजिक अगुवाहरु, जिल्लाभरिका विभिन्न विद्यालयहरूबाट सयौंको संख्याका बालबालिकाहरु, सयौंको संख्यामा स्थानीय बासिन्दाहरु लगायतको उपस्थिति तथा प्रस्तुतीले महोत्सवलाई भव्य बनाएको थियो ।
महोत्सवपछि जारी ७ बुँदे बकैया घोषणापत्रमा बकैया कला–साहित्य प्रज्ञा प्रतिष्ठान गठन गर्ने, सृजनशील नयाँ पुस्ता अभियान निरन्तर अघि बढाउने, पुस्तकालय अभियानलाई निरन्तरता दिने लगायत झरनाले सञ्चालन गर्दै आएको कार्यक्रमलाई निरन्तरता दिनेदेखि महोत्सवमा सहयोग गर्ने सबैलाई धन्यवाद ज्ञापन गर्नेसम्मका विषय छन् ।
घोषणापत्र यस्तो छः
