हेटौंडाः प्रहरीले लागुऔषध सेवन गर्न प्रयोग गर्ने सामानसहित ७ जनालाई पक्राउ गरेको छ । हिजो शुक्रबार साँझ उनीहरुलाई हेटौंडा–९ शान्तिटोलस्थित एक घरबाट पक्राउ गरिएको हो । शंकास्पथ अवस्थामा बसिरहेका ५ जना युवा र २ किशोरीलाई जाँच गर्दा लागुऔषध र सामान फेला परेकोले उनीहरुलाई पक्राउ गरिएको प्रहरीले जनाएको छ ।
ईलाका प्रहरी कार्यालयको टोलीले उनीहरुको साथबाट लागु औषध गाँजा ५७० ग्राम, लागु औषध गाँजाको धुलो ८० ग्राम, बाँसमा कालो टेपले बेरेको चिमनी १ थान, माटोको चिमनी १ थान, लाईटर १ थान, मूर्तिजस्तो देखिने चिमनी १ थान, ग्याँस रिफिल ३०० एमएलको थान १, २ वटा स्कुटर र एउटा मोटरसाइकल बरामद भएको छ ।
पक्राउ परेकाहरुलाई जिल्ला प्रहरी कार्यालयमा राखेर थप अनुसन्धान भईरहेको जिल्ला प्रहरी कार्यालय मकवानपुरका प्रवक्ता तथा प्रहरी निरीक्षक ललन प्रसाद कुर्मीले जानकारी दिए ।
