हेटौंडा,२६ कात्तिकः पूर्वपश्चिम राजमार्ग अन्तर्गत बाराको पथलैया नजिक आइतबार भएको दुर्घटनामा घाइते भएकी महिलाको उपचारको क्रममा मृत्यु भएको छ । उनका श्रीमानको घटनास्थलमै मृत्यु भएकोमा श्रीमतिको उपचारका क्रममा मृत्यु भएको हो ।
हेटौंडा–४, का उदयराज सापकोटा र उनकी श्रीमति दुर्गा सापकोटाको मृत्यु भएको हो । दुर्घटनामा घाइते भएकी दुर्गाको सिमरास्थित अल्पाईन अस्पतालमा उपचार गरिएको थियो ।
थप उपचारका क्रममा मंगलबार उनको काठमाडौंस्थित अस्पतालमा मृत्यु भएको इलाका प्रहरी कार्यालय सिमराका प्रहरी नायव उपरीक्षक गोविन्दराज पुरीले जानकारी दिए ।
पथलैयाबाट हेटौंडातर्फ आउँदै गरेको ना ७ ख २०२ नम्बरको बसले पथलैयातर्फ जाँदै गरेको ना ५५ प ६४४१ नम्बरको मोटरसाइकललाई ठक्कर दिँदा घटना भएको हो । ठक्कर दिने बसका चालक प्रहरी नियन्त्रणमा छन् ।
