हेटौंडा,७ असोजः जिल्ला प्रहरी कार्यालय मकवानपुरले प्रहरीलाई लछारपछार गर्दै भाग्न खोज्ने एकजना गाँजा तस्करलाई गोली हानी नियन्त्रणमा लिएको छ ।
इलाका प्रहरी कार्यालय पशुपतिनगरका प्रहरी निरीक्षक अरुण कुमार कुशवाहा नेतृत्वको टोलीले चालक चौधरीलाई नियन्त्रणमा लिने क्रममा उनको खुट्टामा दुई राउण्ड गोली प्रहार गरेको हो ।
पत्रकार सम्मेलनमा घटनाबारे जानकारी गराउँदै प्रहरीले पर्सा जिल्ला वीरगंज महानगरपालिका–२९ का अफ्रिका चौधरीलाई नियन्त्रणमा लिइएको जनाइएको छ । हेटौंडाबाट पथलैयातर्फ जाँदै गरेको ना ६ ख १३१ नम्बरको ट्रकमा सुरक्षा जाँच गर्ने क्रममा ट्रकका चालक चौधरीले प्रहरी जवान सहित ट्रक्र भगाएका थिए ।
चालक चौधरी र ट्रकमा रहेका अर्का एक व्यक्तिले चुरियामाई नयाँ बस्तिमा ट्रक रोकी प्रहरी जवानलाई लछारपछार गर्दै जंगलतर्फ लैजाने प्रयास गर्दा प्रहरीले उनलाई पछ्याइएको प्रहरीले जनाएको छ ।
घटनामा दुईजना प्रहरी समेत घाइते भएको जिल्ला प्रहरी कार्यालय मकवानपुरका प्रहरी उपरीक्षक मुकेश कुमार सिंहले जानकारी दिए । ट्रकको क्याविनबाट प्रहरीले १४ पोकामा रहेको ७८ किलो ८ सय ग्राम लागुऔषध गाँजा बरामद गरेको छ ।
