हेटौंडाः जागीर लगाइदिने प्रलोभन देखाउँदै ठगी गर्ने एक युवा हेटौंडाबाट पक्राउ परेका छन् । बारा जिल्ला देउताल २ बस्ने २८ वर्षीय सुवास साहलाई प्रहरीले हिजो पक्राउ गरेको हो ।
जिल्ला प्रहरी कार्यालय मकवानपुरबाट खटिएको प्रहरी निरीक्षक अनिश बुढाथोकी समेतको टोलीले उनलाई हेटौंडा–१० बसपार्क स्थित पोखरा होटलबाट राष्ट्रिय अनुसन्धान विभागको दरखास्त फारम भराउँदै गरेको अवस्थामा पक्राउ गरेको जनाएको छ ।
उनले आफूलाई राष्ट्रिय अनुसन्धान विभागको अधिकृत बताउँदै ५ लाख रुपैयाँ पैसा दिए अनुसन्धान सहायक पदमा जागीर लगाईदिन्छु भनि ठगि गरेको पाइएकोले पक्राउ गरिएको र थप अनुसन्धान भइरहेको मकवानपुरका प्रहरी नायव उपरीक्षक यज्ञ प्रसाद भट्टराईले जानकारी दिए ।
साथै उनको साथबाट विभिन्न व्यक्तिको नाममा रहेको नागरीकता र शैक्षिक प्रमाण पत्रको प्रतिलिपि एवं दरखास्त फारमहरु समेत बरामद भएकोले उनीबिरुद्ध थप उजुरी भए जिल्ला प्रहरी कार्यालय मकवानपुरमा सम्पर्क राख्न समेत प्रहरीले अनुरोध गरेको छ ।
