हेटौंडा,२१ वैशाखः केही समयअघि विमोचन भएको समकालीन कविहरुको संयुक्त कविता संग्रह ‘अनुहारको भीड’का तीन सर्जकहरु अनमोल कँडेल, सरद ऋतु र मनोज विश्वकर्माले आज हेटौंडामा संग्रहभित्र समेटिएका आफ्ना कविताहरु प्रस्तुत गरेका छन् ।
हेटौंडास्थित न्यूज क्लब नेपालमा भएको कार्यक्रममा कविहरुले आफ्ना चार/चारवटा कविता प्रस्तुत गरेका हुन् । कविहरुले प्रस्तुत गरेका कवितामाथि अग्रज कविहरु निमेष निखिल, सुवास खनाल र निरा शर्माले टिप्पणी गरेका थिए ।
साहित्य, कला र संगीतको प्रर्वद्धनमा क्रियाशिल बन्दै गएको यश हेटौंडाले आफ्नो पाँचौँ श्रृङ्खला अन्तर्गत यसपटक अनुहारको भीडका युवा कविहरुलाई प्रस्तुत गरेको हो ।
यश हेटौँडाले प्रत्येक महिना फरक– फरक कृति तथा विषयमा कार्यक्रम गर्दै आएको छ । कार्यक्रममा साहित्यकारहरु देवराज खरेल, मुक्ति गोविन्द वैद्य, हरिवंश भेटवाल, शान्ति प्रियवन्दना, भावना सापकोटा, चिरञ्जीवि लामिछाने, पर्मेन्द्र महर्जन, अनिष न्यौपाने (भावना), बगेकी गंगा लगायतको उपस्थिती रहेको थियो ।
