हेटौडा,१३ चैत्र । मकवानपुरको हेटौंडामा जारी दोस्रो शहीद स्मृति राष्ट्रिय फुटबल प्रतियोगितामा आज बुधबार भएको खेलमा विभागीय टोली नेपाल पुलिस क्लबलाई १–० गोल अन्तरको जीतमा आयोजक मकवानपुर ११ फाइनलमा प्रवेश गरेको छ । वन विज्ञान अध्ययन संस्थानको खेल मैदानमा भईरहेको आजको प्रतियोगितामा मकवानपुरका तर्फबाट रेजिन सुव्वाले खेलको ७८ औं मिनेटमा गोल गरेका थिए । आजका विजेताले फाइनलमा थ्रीस्टार क्लब र क्यामरुनी टोली दाफिन्सबीचको विजेतासँग प्रतिस्पर्धा गर्नेछ ।
प्रतियोगिता अन्तर्गत विहीबार दोस्रो सेमिफाइनल थ्रीस्टार क्लब र दाफिन्स क्लबबीच हुनेछ । मकवानपुर जिल्ला फुटबल संघको आयोजनामा जारी प्रतियोगितामा दश टोलीको सहभागिता रहेको छ । प्रतियोगिताका विजेताले नगद आठलाख रुपियाँ र उपविजेताले नगद चारलाख रुपियाँ प्राप्त गर्नेछ ।
