हेटौंडाः प्रहरखबर डटकमका प्रधानसम्पादक भानुभक्त आचार्य केशबलाल स्मृति मातृभूमि पत्रकारिता पुरस्कार २०७५ बाट सम्मानित हुने भएका छन् । मातृभूमि साहित्य समाज मकवानपुरको बैठकले पत्रकार महासंघ मकवानपुरका पूर्बअध्यक्ष अचार्यसहित विभिन्न व्यक्तित्वलाई सम्मान गर्ने निर्णय गरेको हो ।
चैत १६ गते शनिबार हेटौंडामा बिभिन्न बिधाका व्यक्तित्वलाई पुरस्कार तथा सम्मान समर्पण गरिने समाजका महासचिव मनोज ढुँगानाले बताएका छन् । समाजका संस्थापक अध्यक्ष तथा सल्लाहकार ह्यग्रीब आचार्यका अनुसार केशवलाल स्मृति मातृभूमि पत्रकारिता पुरस्कार २०७५ (नगद ७ हजार ५ सयसहित) प्रधानसम्पादक आचार्यलाई प्रदान गरिने भएको हो ।
अन्य पुरस्कारतर्फ मातृभूमि राष्ट्रिय पुरस्कार २०७४ (नगद २१ हजार १ सहित) डा. तुलसी भट्टराई (काठमाडौं), शेखर शर्मारिजाल स्मृति मातृभूमि शैक्षिक पुरस्कार २०७३ (नगद १५ हजारसहित) शिक्षासेवी देवप्रसाद श्रेष्ठ तथा बद्री खतिवडा (मकवानपुर), शेखर शर्मारिजाल स्मृति मातृभूमि शैक्षिक पुरस्कार २०७४ (नगद १५ हजारसहित) शिक्षासेवी बनमाली सुबेदी तथा सजनी गोर्खाली (मकवानपुर)लाई प्रदान गरिने निर्णय भएको छ ।
सम्मानतर्फ हातेमालो मातृभूमि युवा सिर्जनशील सम्मान २०७४ (नगद १० हजार १ सहित) सानुभाइ बिश्वकर्मा (मकवानपुर), क्षेत्रबहादुर स्मृति मातृभूमि सम्मान २०७४ (नगद १० हजारसहित) संस्कृत वेद विद्यालय (हेटौंडा–१०, मकवानपुर), राजकुमार स्मृति मातृभूमि सम्मान २०७५ (नगद १० हजार १ सहित) उषा तिवारी (चितवन)लाई प्रदान गरिने निर्णय भएको महासचिव ढुँगानाले जानकारी दिएका छन् ।
