हेटौंडा,३० मंसीरः मकवानपुरको हेटौंडा उपमहानगरपालिका–१ चौकिटोलस्थित सुमोपार्कमा यात्रुसँग निर्धारित टिकट दर भन्दा बढी भाडा असुलेको भन्दै प्रहरीले एक जनालाई पक्राउ गरेको छ ।
आईतबार मकवानपुर प्रहरीले सुमोपार्कमा हेटौंडाबाट काठमाडौं जाने यात्रुसँग निर्धारित टिकट दर भन्दा बढी रकम माग्ने र नदिने यात्रुहरुलाई जबर्जस्ती सुमोबाट ओराली रहेको अवस्थामा हेटौंडा उपमहानगरपालिका–१ पिपलबोट बस्ने वर्ष २९ को रामचन्द्र मोक्तानलाई पक्राउ गरेको हो । पक्राउ परेको मोक्तानको आवश्यक अनुसन्धान भइरहेको जिल्ला प्रहरी कार्यालय मकवानपुरले जनाएको छ ।
सुमो काउन्टरमा सुमोको कृत्रिम अभाव सिर्जना गरी यात्रुसँग बढी भाडा असुल्ने गरेका छन् । हेटौंडा–काठमाण्डौं जोड्ने छोटो दुरीको मार्ग भएर चल्ने सुमोबाट दैनिक सयौं यात्रुहरु ठगिँदासम्म स्थानीय प्रशासन मौन छ ।
हेटौंडा–काठमाडौं जोड्ने छोटो दुरीको मार्ग भएर चल्ने सुमोबाट वर्षेनी चाडपर्वको समय तथा अन्य समयमा ठगीधन्दा हुने बारे प्रशासनलाई जानकारी हुदाँ समेत यात्रुहरु सधैं ठगिनु पर्दा आमनागरिकले सुशासनको अनुभूति गर्न नपाएको यात्रुहरुको गुनासो छ ।
