हेटौंडा,४ मंसीरः मकवानपुरको इन्द्रसरोबर गाउँपालिका–४, मा रहेको फाखेल प्रहरी चौकी भवनको उद्घाटन भएको छ । नवनिर्मित भवनको ३ नम्बर प्रदेश प्रहरी कार्यालयका प्रमुख प्रहरी नायव महानिरीक्षक (डिआईजी) शेरबहादुर बस्नेतले आज बुधबार उद्घाटन गरेका हुन् ।
राष्ट्रिय पुनर्निर्माण प्राधिकरणको एक करोड ५७ लाख ६ हजार ५ सय ५५ रुपैयाँ सहयोगमा पवित्र मल्टिपल कन्स्ट्रक्सन प्रा.लिले प्रहरी चौकी भवन निर्माण गरेको हो । ३ तल्ले ११ कोठे भवनमा कार्यालय, व्यारेक, मेष र शौचालय रहेको छ ।
प्रहरी चौकी निर्माणका निम्ति जग्गा प्रदान गर्ने जग्गादाता इन्द्र सरोवर–४ का धनबिर स्याङ्तान, मानविर स्याङ्तान, भिम बहादुर स्याङ्तान र भवन निर्माण गर्ने पवित्र मल्टिपल कन्स्ट्रक्सनका उमेश लामा सहित ४ जनालाई भवन उद्घाटन समारोहका बीच प्रशंसापत्र सहित दोसल्ला ओढाएर सम्मान गरिएको छ ।
कार्यक्रममा गाउँपालिकाकी उपाध्यक्ष उमाकुमारी लामा, इन्द्रसरोबर–४ का वडाध्यक्ष धनविर स्याङ्तान, १ नम्बर वडाध्यक्ष जमानसिं लामा, राष्ट्रिय अनुसन्धान कार्यालय हेटौंडाका निर्देशक कमल थापा, जिल्ला प्रहरी कार्यालय मकवानपुरका प्रहरी उपरीक्षक मुकेश कुमार सिंह, रातोमाटे गणका महेन्द्र नेपाल, ट्राफिक प्रहरी कार्यालय मकवानपुरका प्रहरी निरीक्षक हरिविष्णु ढकाल, जिल्ला प्रशासन कार्यालय मकवानपुरका अधिकृत मदन लामा, नेपाल प्रहरी श्रीमती संघका ३ नम्बर प्रदेश अध्यक्ष लक्ष्मी बस्नेत लगायत उपस्थित थिए ।
