हेटौंडा,२९ कात्तिकः जिल्ला प्रहरी कार्यालय मकवानपुरले एक किलो नक्कली सुनसहित दुई जनालाई पक्राउ गरेको छ । मकवानपुरको हेटौंडा उपमहानगरपालिका–१, स्थित त्रिभुवन राजपथ सडकखण्डबाट पक्राउ परेका उनीहरुलाई आज सार्वजनिक गरिएको हो ।
पक्राउ पर्नेहरुमा दोलखा जिरी नगरपालिका–३, का ४७ वर्षीय ध्याल सिंह शेर्पा र सोही मोटरसाईकलको पछाडी सवार मकवानपुर राक्सिराङ गाउँपालिका–४, का अभय कुमार थिङ रहेको जिल्ला प्रहरी कार्यालय मकवानपुरले जनाएको छ ।
त्रिभुवन राजपथ सडक खण्डमा सुरक्षाजाँच गर्ने क्रममा भैंसेबाट हेटौंडातर्फ आउँदै गरेको बा. ९३ प ९०६ नम्बरको पल्सर मोटरसाईकललाई रोकी जाँच गर्दा एक उनीहरुको साथबाट एक केजी नक्कली सुन फेला पारिएको प्रहरीले जनाएको छ । उनीहरुलाई नक्कली सुन, मोटरसाईकल सहित नियन्त्रणमा लिई ठगी मुद्दामा आवश्यक अनुसन्धान भइरहेको प्रहरीले जनाएको छ ।
हेटौंडा उपमहानगरपालिकाका विभिन्न स्थानहरुमा यसअघि विभिन्न समयमा नक्कली सुन देखाई नगद सहित गरगहनाहरु ठगी गर्ने घटनाहरु भएकोमा सो घटनाहरु समेतमा उनीहरुको संलग्नता हुन सक्ने देखिएको हुँदा उनीहरुमाथि थप अनुसन्धान भइरहेको जिल्ला प्रहरी कार्यालय मकवानपुरका प्रहरी निरीक्षक तथा निमित्त प्रवक्ता ललन प्रसाद कुर्मीले जानकारी दिए ।
