हेटौंडाः प्रहरीले खयरको गोलिया लोड भएको इस्करपियो सहित २ जनालाई पक्राउ गरेको छ ।
इलाका प्रहरी कार्यालय पशुपतिनगरबाट खटिएको प्रहरी टोलीले हेटौंडा–१५ रातोमाटे चेक पोष्टमा सुरक्षा जाँच गर्दा ५० गोलिया खयर बरामद गरेको जिल्ला प्रहरी कार्यालय मकवानपुरका एसपी मुकेश कुमार सिंहले जानकारी दिए ।
खयर सहित पक्राउ पर्नेमा गाडी चालक बर्दिया सैनिवार–६ का २७ वर्षीय अमित शाह र गाडीमा सवार मकवानपुरको बकैया–१ का ३२ वर्षीय चक्रबहादुर योञ्जन रहेको प्रहरीले जनाएको छ ।
पथलैयाबाट हेटौंडा आउँदै गरेको बा १० च २७०६ नम्बरको इस्करपियोलाई जाँच गर्दा उक्त परिमाणको खयर बरामद भएको हो । बरामद भएको खयर डिभिजन बन कार्यालय मकवानपुरमा पठाइने एसपी सिंहले जानकारी दिए ।
